Pilotprosjektet Løvåshagen BL er det fyrste bustadprosjektet i Bergen kommune der universell utforming er teken inn i reguleringsinstruksane og der 28 leilegheiter blir bygd som ”passivhus”. Prosjektet har også gode kvalitetar innanfor miljø og byggjeskikk.
Bybo AS tok kontakt med Husbanken allereie i februar 2005, før arbeidet med reguleringsplanen starta. Dette har resultert i eit godt samarbeid over 2 år og tilsegn til bygging av 80 burettslagsleilegheiter i Bergen. Då samarbeidet mellom Bybo AS og Husbanken starta var hovudmålet fokus på nytenking innanfor energireduserande tiltak, universell utforming og byggjeskikk.
Verkemiddel
Samla bruk av Husbankens verkemiddel (lån, kompetansetilskot, intensjonsavtale og tidleg samarbeid mellom Bergen kommune, Husbanken og Bybo AS) har ført til eit av dei mest ambisiøse prosjekta i landet når det gjeld energisparing i bustader.
Formålet med intensjonsavtalen mellom Husbanken Region vest og Bybo AS er å utvikle og gjennomføre eit framtidsrette eksempelprosjekt med omsyn til lågt energiforbruk og universell utforming.
Kvalitetar i bustadene
Dei 80 prosjekterte leilegheitene er fordelte på fire bustadblokker med tre-, fire- og femromsleilegheiter i storleikar frå 56 BRA til 106 BRA. Prosjektet får ein nyskapande arkitektur, og det har gjennom heile prosessen vore arbeidet medvite med dette.
Bygningane har heis og alle leilegheitene har livsløpstandard. Felles uteareal og tilkomst skal vere universelt utforma. Bygningane er grupperte rundt eit bilfritt tun med gode leike- og opphaldsareal. Under delar av bygningane blir det felles garasjeanlegg.
Alle leilegheitene vender mot vest/sørvest og har gode solforhold.
Framtidas bustader
Av dei 80 prosjekterte leilegheitene vil 52 leilegheiter byggjast som lågenergibustader og 28 leilegheiter som ”passivhus”. ”Passivhus” er ei nemning på bustader med ekstremt lågt behov for oppvarming og som dekkjer ein omfattande del av energibehovet sitt med fornybar energi.
Forenklet snitt av toppetasjen i de kommende passivhusene utenfor Bergen. Fargekoder: Røde deler av rørsystem frakter oppvarmet væske. Lilla deler frakter væske som har avgitt varme og nå strømmer tilbake til varmekilden for ny oppvarming. Væsken i sløyfa i badegolvet avgir golvvarme på returen fra radiatoren. Illustrasjon: Tor Åsmund Evjen.
For å utvikle prosjektet blei det gitt kompetansetilskot frå Husbanken, samt tilskot frå Enova. På nettsida til NTNU står det følgjande om bustadene:
”Her er bustaden einkvar energiminister vil elske. Lågt varmetap krympar fyringsbehovet til nær ein sjettedel av det normale. I tillegg får du soloppvarma badegolv!”
Det skal installerast solfangarar på taket av to av blokkene. Dette har vore brukt i utlandet, men er ganske nytt i Noreg. Sjølv om Bergen ikkje er berømt for sitt strålande solskinn, vil solfangarane gi god effekt. Solfangarane utnyttar også diffus solstråling, og vil derfor ta opp energi også når det er overskya, fortel Dokka til Byavisen Eiendom.
I eit intervju med Byavisen Eiendom i november 2006 seier Kjetil Helland i Bybo AS at dei ønskjer å satse vidare på energisparing. Dei har stor tru på at lågenergibustader og passivhus blir framtidas bustader, og ønskjer å vere i front av denne utviklinga.
Leilegheitene vil vere klare for innflytting i løpet av andre halvår 2008.
Her kan du lese meir om Løvåshagen BL:
http://lovashagen.rediger.no/?page=6